تغطية لايفنت بنفت لإطلاق مسكرا رولر لاش + ريفيو عن المسكرا

السلام عليكم ورحمة الله وبركاته..

اليوم حكتب عن اول ايفنت حضرته وكان ايفنت لبنفت لإطلاق ماسكرا رولر لاش الإيفنت كان جدا جميل وقابلت بعض من البلوقرز يعني كان يوم جميل وانبسطت فيه الحمدلله ..


كان في بووث للتصوير ودي الحاجات كانوا حاطينها للبووث عشان نتصور بيها

مرة عجبني دا الشي انه تمسكيه وتصوري بيه كأنك جوته صورة ومكتوب حساب بنفت وموقع الايفنت اللي هو كان في نوش لاونج - جدة

ودحين حوريكم الديكوريشن كيف كان ونظرة عامة ع الايفنت..

وهنا كانت القوودي باقز..

هنا ركن مسكرا رولر لاش حبيت انهم حاطين الرولر حق الشعر جنبها يعني يوصلولك المقصد انه ماتحتاجي تعقصي رموشك مع دي المسكرا 

وهنا كل اللي حضروا كتبوا أساميهم ..

ودحين طبعا حوريكم القوودي باق 

ودي الأشياء اللي كانت جوت القوودي باق ..

ودي مسكرا رولر لاش وعشاني اتأخرت في البوست فأستخدمتها فترة كافية فحكتب ريفيو عنها في آخر البوست

ريفيو مسكرا رولر لاش

اول شي حكتبلكم اللي مكتوب في علبة المسكرا وايش دي المسكرا تسوي وجنبها حكتب رأيي..

1- "انها تطول الرموش" صح هيا تطول الرموش وماكتبوا انها تكثف وصراحة ماتكثف يعني اللي تدور على تكثيف دي المسكرا
محا تعجبها .

2- "انها تعمل كيرل للرموش يعني ترفع الرموش على فوق" في بنات رموشهم من الله نازلة على تحت او مهي مرفوعة على فوق وصح دا الشي تسويه لانه فرشتها ترفع الرمشات على فوق وتمسك الرموش رمشة رمشة لإنه فرشتها بلاستيك وكأنها دبابيس والكيرف (الانحناءة) اللي في نفس المسكرا تسمح لدا الشي .

3- "انها تفتح العين وتوسعها" طبعا بتسوي دا الشي لإنها بترفع الرموش على فوق فإللي رموشهم نازلة حيبان الاختلاف في عينهم مرة كتير حتى انا مرة لاحظت دا الشي .

4-"انها تمسك الرفعة او الكيرل ل12 ساعة وتنمسح بسهولة" ماادري كم ساعة انا سبتها على عيوني بس دايما اطول بالمكياج يعني امكن خليتها 12 ساعة وامكن اقل بس عموما لاحظت انها مسكت الكيرل لكن تنمسح بسهولة لا مو مرة بس اسهل من ذير ريل .

وبشكل عام المسكرا عجبتني للاستخدام اليومي لانها ماتكثف بس تطول وتعمل كيرل للرموش وحلوة لانها توسع العين بس احسها انسب للي محتاجتها يعني اللي رموشها على تحت او ستريت وحدة من صحباتي رموشها مرة نازلة على تحت مرة مسكت شنطة مكياجي واستخدمتها ومرة عجبتها وحسيت انها رفعت رموشها شوية . يعني هيا انسب مسكرا للي رموشها قصيرة ونازلة على تحت .

-وترى المسكرا نزلت في سيفورا اول ابريل وسعرها 140 ريال.

مشترياتي من سيفورا امريكا

بسم الله الرحمن الرحيم 

السلام عليكم ورحمة الله وبركاته

راح اوريكم مشترياتي من سيفورا امريكا وصيت احد يشتريلي هيا لأن الموقع رفض فيزتي ومايقبل صناديق شحن وهمية زي ارامكس ووردشيب وكدا.. 

جاتني الاغراض بكيسها طلبت الأغراض على حسب اقتراحاتكم يوم ماطلبت منكم اقتراحات في الإنستقرام لإني كنت بطلب اون لاين وكلكم طرح عليا افكار وطبعا في اشياء كنت مفكرة فيها من اول وحمستوني اكتر لمن قولتولي خديها..

وهدي الاغراض كلها 

Hourglass Ambient Lighting powder Palette

 Nars radiant creamy concealer - shade ginger 

Nars Virtual Domination Cheek Palette

Becca Shimmering Skin Perfector Pressed in Opal

Nars All Day Luminous Powder Foundation spf 24 in Barcelona 

Hourglass Ambient Lighting Blush in luminous flush

Anastasia Beverly hills brow wiz in dark brown

كنت ابغا حاجات تانية ارواج كات فون دي بس مالقت اللون اللي ابغاه وكزا حاجة تانية مالقتها وماقدرت تنزل لانه خلاص كانت راجعة السعودية :( بس يلا ان شاءالله المرة الجاية اورط احد وهو راجع يجيبلي 

طريقة الطلب من موقع thebalm ومشترياتي

بسم الله الرحمن الرحيم 

اليوم بتكلم عن طريقة الشراء من ذا بالم the balm اون لاين والتوصيل دولي للسعودية مباشرة يعني مايحتاج يكون عندك بريد امريكي ولا اي شي بس بريدك السعودي مو شرط يكون بريدك بريد شغل اختك ابوكي اي احد انا حطيت بريد شغل اختي اهم شي توثقي انو حيوصلوا الاغراض للشخص اللي حطيتي بريدو بس.

اول شي كان في تخفيض 50% على كل حاجة في موقعهم لمدة ساعتين فقط طبعا استغليت الفرصة دي واشتريت ليا ولاختي كل اللي نبغاه 

ودي مشترياتي انا واختي 

الطلبية قعدت اسبوعين ووصلت للبريد السعودي المركزي في جدة حي البلد جاني ايميل انها وصلت واتصلت عليهم اتأكدت, بس انا روحت استلمتها تالت اسبوع يعني مايصلوها لبيتك انتي تروحي تستلميها.

(سعر الشحن دولي ثابت 25$) توصلك للبريد السعودي.
و اذا طلبتي بـ 150$ او اكثر يصير مجاني يعني يوصلك لبريدك في السعودية وتستلميها بدون اي مبلغ للشحن.
انا جاني الشحن مجاني مع انه بعد التخفيض كان 102$ يعني حسبوا مبلغ اغراضي قبل الشحن اللي هو 204$ انه يعتمد الشحن المجاني (شي جميل صراحة)..
ودي فاتورة اللي طلبناه, شوفوا كم كان وكم صار بعد التخفيض..

ودحين بوريكم كيف تعملوا حساب في موقع thebalm خطوة بخطوة وان شاءالله يكون كل شي واضح ومفهوم

اول شي ادخلوا موقع Thebalm واضغطوا على Create account فوق على اليمين..

بعدين تعبي بياناتك..

وبكدا يكون سويتي حساب في الموقع ويحتاج تعبي معلومات التواصل والعنوان..

دحين تقدري تختاري اي شي تبغيه من الموقع بإضافتو للعربة او الحقيبة, تدخلي على المنتج وبعدين تضغطي Add to cart 
وبعد ماتحطي كل اللي تبي تشتريه تضغطي على Check out فوق على اليمين او بعد ماتضيفي للعربة اخر منتج تطلعلك نافذة مكتوب فيها View cart & check out.. 

بعدين نيجي لطريقة الدفع وتجهيز الطلب لشحنه دوليًا..
(خطوة رقم 1 اللي هي رمز التخفيض مهي لازم تكون عندك وان شاءالله اكتب عن كوبونات التخفيض موضوع لان اغلب 
مواقع الشراء اون لاين يكون لهم كوبونات تخفيض او شحن مجاني).
" وزي ماقلت سعر الشحن الدولي ثابت 25$ الا اذا طلبتي بـ150$ او اكثر يصير مجاني".

  

بعد ماتضغطي Proceed to check out حيطلبوا منك تدخلي حسابك "اللي هو سويناه في الاول بإيميلك والرقم السري"..

بعدين تكتبي معلومات بطاقة الدفع سواء كانت فيزا او اميركان اكسبريس او ماستر كارد او ديسكوفر <-- دي البطايق اللي يقبلها الموقع.. (اهم شي الاسم يكون نفسه اللي على البطاقة)

ازا كان عنوان الشحن نفس عنوان بطاقة الدفع راح يعدي خطوة الـ shipping information ويروح على الـ Shipping method..

اما ازا كان عنوان الشحن مختلف عن عنوان بطاقة الدفع حتروحي على الـ Shipping information وتعبي البيانات (اسمك الاول والاخير واسم الشركة وعنوان الشارع او الحي والمدينة والبلد ورقم البريد ووالتلفون والفاكس) البيانات اللي موجود جمبها * يعني مو ضرورية..

وبعدها Shipping method يبينلك تكلفة الشحن وبس زي الصورة اللي قبل السابقة..

واخر شي معلومات الدفع..
نوع البطاقة زي ماقلت يقبلوا(فيزا وماستركارد واميركان اكسبريس وديسكوفر)
رقم البطاقة الموجود على وجه البطاقة الطويل المكون من 13 رقم.
تاريخ انتهاء البطاقة يكون واضح على وجه البطاقة الشهر والسنة
رقم تأكيد البطاقة يكون ورا البطاقة مكون من 3 ارقام وازا ضغطتوا على ?what is this راح يوضحلك بالزبط فين مكانها..

وبعد كدا تضغطي continue واخر خطوة حتكون نظرة اخيرة على طلبك بالكامل وتأكدي العملية وبس .


يارب تكونوا فهمتوا الشرح كامل ووصلتلكم المعلومة وان شاءالله لو جا تخفيض 50% تاني مرة من ذا بالم حقولكم في انستقرام 
حسابي في انستقرام

البداية.

بسم الله الرحمن الرحيم نبدأ, من فترة وانا نفسي اسوي بلوق وابدأ اكتب فيه واضيف حاجات عن نفسي وكل شي, واشاركها مع ناس اعرفهم ومااعرفهم عادي وانو نتشارك نفس الاهتمامات وهكا, دا الكلام بكتبو ومني عارفة ايش حيصير لسة كيف حينحط والخ,  وبس باي.